10 Best Allama Iqbal Poems in Urdu For Kids and Students

Read best collection of Allama Iqbal Poems which is selected from Iqbal Poetry Books. Bache ki dua, Hamdardi, Sare jahan se acha ye hindostan hamara, Tere ishaq ki inteha chahta hon, Nigahe fakar mein shane sikandri kia ha, Sitaron se aage jahan aur bhi hain, Aik Makra Aur Makhi, Maan Ka Khawab, Asrar-e-Paida, Aik Pahar Aur Gulehri

Hamdardi
(Makhooz Az William Cowper)
Bachon Ke Liye

Tehni Pe Kisi Shajar Ki Tanha
Bulbul Tha Koi Udas Baitha

Kehta Tha Ke Raat Ser Pe Aayi
Urne Chugne Mein Din Guzra

Pohenchun Kis Tarah Aashiyan Tak
Her Cheez Pe Cha Gya Andhera

Sun Kar Bulbul Ki Aah-O-Zari
Jugnu Koi Pas Hi Se Bola

Hazir Hun Madad Ko Jaan O Dil Se
Keera Hun Agarche Mein Zara Sa

Kya Gham Hai Jo Raat Hai Andheri
Main Rah Mein Roshani Karon Ga

Allah Ne Di Hai Mujh Ko Mishal
Chamka Ke Mujhay Diya Banaya

Hain Log Wohi Jahan Mein Ache
Aate Hain Jo Kaam Dusron Ke

………………

Sitaron se aage jahan aur bhi hain

Sitaron se aage jahan aur bhi hain
abhi ishq ke imtihan aur bhi hain

tahi zindagi se nahin ye fazaen
yahan saikDon karwan aur bhi hain

qanaat na kar aalam-e-rang-o-bu par
chaman aur bhi aashiyan aur bhi hain

agar kho gaya ek nasheman to kya gham
maqamat-e-ah-o-fughan aur bhi hain

tu shahin hai parwaz hai kaam tera
tere samne aasman aur bhi hain

isi roz o shab mein ulajh kar na rah ja
ki tere zaman o makan aur bhi hain

gae din ki tanha tha main an

………………

Lab pe aati hai dua ban ke tamanna meri

Lab pe aati hai dua ban ke tamanna meri
zindagi shama ki surat ho KHudaya meri!

dur duniya ka mere dam se andhera ho jae!
har jagah mere chamakne se ujala ho jae!

ho mere dam se yunhi mere watan ki zinat
jis tarah phul se hoti hai chaman ki zinat

zindagi ho meri parwane ki surat ya-rab
ilm ki shama se ho mujh ko mohabbat ya-rab

ho mera kaam gharibon ki himayat karna
dard-mandon se zaifon se mohabbat karna

mere allah! burai se bachana mujh ko
nek jo rah ho us rah pe chalana mujh ko

lab pe aati hai dua ban ke tamanna meri
zindagi shama ki surat ho KHudaya meri!

………………

Tere ishq ki intiha chahta hun

Tere ishq ki intiha chahta hun
meri sadgi dekh kya chahta hun

sitam ho ki ho wada-e-be-hijabi
koi baat sabr-azma chahta hun

ye jannat mubarak rahe zahidon ko
ki main aap ka samna chahta hun

zara sa to dil hun magar shoKH itna
wahi lan-tarani suna chahta hun

koi dam ka mehman hun ai ahl-e-mahfil
charagh-e-sahar hun bujha chahta hun

bhari bazm mein raaz ki baat kah di
baDa be-adab hun saza chahta hun

………………

Tarana-e-Hindi

Sare jahan se achchha hindostan hamara
hum bulbulen hain is ki ye gulsitan hamara

ghurbat mein hon agar hum rahta hai dil watan mein
samjho wahin hamein bhi dil ho jahan hamara

parbat wo sab se uncha ham-saya aasman ka
wo santari hamara wo pasban hamara

godi mein khelti hain is ki hazaron nadiyan
gulshan hai jin ke dam se rashk-e-jinan hamara

ai aab-rud-e-ganga wo din hai yaad tujh ko
utra tere kinare jab karwan hamara

mazhab nahin sikhata aapas mein bair rakhna
hindi hain hum watan hai hindostan hamara

yunan o misr o ruma sab miT gae jahan se
ab tak magar hai baqi nam-o-nishan hamara

kuchh baat hai ki hasti miTti nahin hamari
sadiyon raha hai dushman daur-e-zaman hamara

‘iqbaal’ koi mahram apna nahin jahan mein
malum kya kisi ko dard-e-nihan hamara.

………………

Nigah-e-Faqr Mein Shan-e-Sikandari Kya Hai

Nigah-e-Faqr Mein Shan-e-Sikandari Kya Hai
Kharaj Ki Jo Gada Ho, Woh Qaisri Kya Hai!

Buton Se Tujh Ko Umeedain, Khuda Se Naumeedi
Mujhe Bata To Sahi Aur Kafiri Kya Hai.

Falak Ne Un Ko Atta Ki Hai Khawajgi Ke Jinhain
Khabar Nahin Rawish-e-Banda Parwari Kya Hai

Faqt Nigah Se Hota Hai Faisla Dil Ka
Na Ho Nigah Mein Shaukhi To Dilbari Kya Hai

Issi Khata Se Itaab-e-Mulook Hai Mujh Par
Ke Janta Hun Maal-e-Sikandari Kya Hai.

Kise Nahin Hai Tamana-e-Sarwari, Lekin
Khudi Ki Mout Ho Jis Mein Woh Sarwari Kya Hai!

Khush Aa Gyi Hai Jahan Ko Qalandari Meri
Wagarna Shair Mera Kya Hai, Shayari Kya Hai!

………………

Aik Makra Aur Makhi
(Makhooz) – Bachon Ke Liye

Ek Din Kisi Makhi Se Ye Kehne Laga Makra
Iss Rah Se Hota Hai Guzar Roz Tumhara

Lekin Meri Kutiya Ki Na Jagi Kabhi Kismat
Bhoole Se Kabhi Tum Ne Yahan Paun Na Rakha

Ghairon Se Na Miliye To Koi Baat Nahin Hai
Apno Se Magar Chahiye Yun Khinch Ke Na Rehna

Aao Jo Mere Ghar Mein To Izzat Hai Ye Meri
Woh Samne Seerhi Hai Jo Manzoor Ho Ana

Makhi Ne Suni Baat Jo Makre Ki To Boli
Hazrat! Kisi Nadan Ko Dijiye Ga Ye Dhoka

Iss Jaal Mein Makhi Kabhi Aane Ki Nahin Hai
Jo Aap Ki Seerhi Pe Charha, Phir Nahin Utra

Makre Ne Kaha Wah! Farebi Mujhay Samjhe
Tum Sa Koi Nadan Zamane Mein Na Ho Ga

Manzoor Tumhari Mujhe Khatir Thi Wagarna
Kuch Faida Apna To Mera Iss Mein Nahin Tha

Urti Huwi Ayi Ho Khuda Jane Kahan Se
Thehro Jo Mere Ghar Mein To Hai Iss Mein Bura Kya!

Iss Ghar Mein Khai Tum Ko Dikhane Ki Hain Cheezain
Bahir Se Nazar Ata Hai Chotti Si Ye Kutiya

Latke Huay Darwazon Pe Bareek Hain Parde
Diwaron Ko Aaeyno Se Hai Mein Ne Sajaya

Mehmanon Ke Aaram Ko Hazir Hain Bichone
Her Shaks Ko Saman Ye Mayaser Nahin Hota

Makhi Ne Kaha Khair, Ye Sub Theek Hai Lekin
Mein Aap Ke Ghar Aaun, Ye Umeed Na Rakhna

In Naram Bichonon Se Khuda Mujh Ko Bachaye
So Jaye Koi In Pe To Phir Uth Nahin Sakta

Makre Ne Kaha Dil Mein, Suni Baat Jo Uss Ki
Phansun Issay Kis Tarha Ye Kambakhat Hai Dana

So Kaam Khushamad Se Nikalte Hain Jahan Mein
Dekho Jise Duniya Mein Khushamad Ka Hai Banda

Ye Soch Ke Makhi Se Kaha Uss Ne Bari Bee !
Allah Ne Bakhsha Hai Bara Aap Ko Rutba

Hoti Hai Ussay Aap Ki Soorat Se Mohhabat
Ho Jis Ne Kabi Aik Nazar Aap Ko Dekha

Aankhain Hain Ke Heeray Ki Chamakti Huwi Kaniyan
Ser Aap Ka Allah Ne Kalgi Se Sajaya

Ye Husn, Ye Poshak, Ye Khubi, Ye Safai
Phir Iss Pe Qayamat Hai Ye Urte Huay Gana

Makhi Ne Suni Jab Ye Khushamad To Pasiji
Boli Ke Nahin Aap Se Mujh Ko Koi Khatka

Inkar Ki Aadat Ko Samajhti Hun Bura Mein
Sach Ye Hai Ke Dil Torna Acha Nahin Hota

Ye Baat Kahi Aur Uri Apni Jagha Se
Paas Ayi To Makre Ne Uchal Ker Ussay Pakra

Bhooka Tha Kai Roz Se, Ab Hath Jo Ayi
Aaram Se Ghar Baith Ke Makhi Ko Uraya

Maan Ka Khawab
(Makhooz – Bachon Ke Liye)

Mein Soyi Jo Ek Shab To Dekha Ye Khawab
Barha Aur Jis Se Mera Iztarab

Ye Dekha Ke Mein Ja Rahi Hun Kahin
Andhera Hai Aur Rah Milti Nahin

Larazta Tha Der Se Mera Baal Baal
Qadam Ka Tha Dehshat Se Uthna Mahal

Jo Kuch Hosla Pa Ke Aagay Berhi
To Dekha Qitar Aik Larkon Ki Thi

Zumurad Si Poshak Pehne Huay
Diye Sub Ke Hathon Mein Jalte Huay

Woh Chup Chap Thay Agay Peche Rawan
Khuda Jane Jana Tha Un Ko Kahan

Iss Soch Mein Thi Ke Mera Pisar
Mujhe Uss Jamat Mein Aya Nazar

Woh Peche Tha Aur Taez Chalta Na Tha
Diya Uss Ke Hathon Mein Jalta Na Tha

Kaha Mein Ne Pehchan Ker, Meri Jaan!
Mujhe Chor Ker Aa Gye Tum Kahan?

Judai Mein Rehti Hun Main Be-Qarar
Paroti Hun Her Rouz Ashkon Ke Haar

Na Perwa Humari Zara Tum Ne Ki
Gye Chor, Achi Wafa Tum Ne Ki!

Jo Bache Ne Dekha Mera Peach O Taab
Diya Uss Ne Munh Phair Ker Yun Jawab

Rulati Hai Tujh Ko Juddai Meri
Nahin Uss Mein Kuch Bhi Bhalai Meri

Ye Keh Ker Vo Kuch Dair Tak Chup Raha
Diya Phir Dikha Ker Ye Kehne Laga

Samajhti Hai Tu Ho Gaya Kya Issay?
Tere Aanasuon Ne Bhujaya Issay!

Asrar-e-Paida

Uss Qoum Ko Shamsheer Ki Hajat Nahin Rehti
Ho Jis Ke Jawanon Ki Khudi Soorat-e-Foulad

Na-Cheez Jahan-e-Meh-o-Parveen Tere Agay
Woh Alam-e-Majboor Hai, Tu Alam-e-Azad

Moujon Ki Tapish Kya Hai, Faqt Zauq-e-Talab Hai
Pinhan Jo Sadaf Mein Hai, Woh Doulat Hai Khudadad

Shaheen Kabhi Parwaz Se Thak Kar Nahin Girta
Pur Dam Hai Agar Tu To Nahin Khatra-e-Uftad

 

Aik Pahar Aur Gulehri
(Makhooz Az Emerson) – Bachon Ke Liye

Koi Pahar Ye Kehta Tha Ek Gulehri Se
Tujhe Ho Sharam To Pani Mein Ja Ke Doob Maray

Zara Si Cheez Hai, Iss Pe Garoor, Kya Kehna
Ye Aqal Aur Ye Samajh, Ye Shaur, Kya Kehna!

Khuda Ki Shan Hai Na-Cheez, Cheez Ban Baithen
Jo Be-Shaur Hon, Yun Ba-Tameez Ban Baithen

Teri Bisat Hai Kya Meri Shan Ke Aagay
Zameen Hai Passt Meri Aan Baan Ke Aagay

Jo Baat Mujh Mein Hai, Tujh Ko Vo Naseeb Kahan
Bhala Pahar Kahan, Janwar Gareeb Kahan!

Kaha Ye Sun Ke Gulehri Ne, Munh Sambhal Zara
Ye Kachi Baatain Hain Dil Se Inhain Nikal Zara

Jo Mein Bari Nahin Teri Tarah To Kya Parwa
Nahin Hai Tu Bhi To Aakhir Meri Tarah Chotta

Her Aik Cheez Se Paida Khuda Ki Qudrat Hai
Koi Bara, Koi Chotta, Ye Uss Ki Hikmat Hai

Bara Jahan Mein Tujh Ko Bana Diya Uss Ne
Mujhe Darakht Pe Charhna Sikha Diya Uss Ne

Qadam Uthane Ki Takat Nahin Zara Tujh Mein
Niri Barai Hai, Khubi Hai Aur Kya Tujh Mein

Jo Tu Bara Hai To Mujh Sa Hunar Dikha Mujh Ko
Ye Chaliya Hi Zara Tor Ker Dikha Mujh Ko

Nahin Hai Cheez Nakami Koi Zamane Mein
Koi Bura Nahin Qudrat Ke Karkhane Mein

 

Read More: Allama Iqbal Poetry in Urdu with English Translation

Top Urdu Poetry